![image](https://abws-dev-s3.s3-ap-southeast-1.amazonaws.com/df3b1c216cefc9ce9d22ccd3fb11cdaa.jpg)
冬菇亭
黃大仙屋邨大排檔即係冬菇亭,係一座四方形嘅亭加上有一個尖頂而得名。形容吓佢先:一亭四舖設計,中間十字形係每間舖嘅廚房,因為舖內面積有限,又要擺貨啦,所以一定會向外延伸出去,會霸佔空地擺枱。尤其是晚飯時間,好熱鬧。
第一個冬菇亭誕生在愛民邨,係1974年嘅時候。早年嘅冬菇亭係冇冷氣,因為供電嘅電纜唔夠力提供冷氣,只靠幾把強力嘅大牛角扇吹走熱氣,之前講過舖內座位有限,而且又熱,好少客人會在室內食嘢,多數坐在室外。因為抵食夾大件嘅關係,所以好受歡迎。因為經常佔用公共空間,常會惹來投訴,食環署索性擺放石躉在通道上以作懲罰。之前講過,開檔要擺枱在室外,收檔就要將啲枱椅收番和清潔地方,其實好似小販咁,都幾辛苦㗎!
講返現在黃大仙大排檔先,大家見到好靚,已經有冷氣啦,同埋領展批准佢哋在舖外擺枱,所以好貴租。為咗應付領展嘅嚴格要求,佢哋團結一致,仲改咗個好有意思嘅英文名Together ,而中文名就係醉和里。集合三家店舖幾代人經營嘅經驗,例如:醉記擅長小炒,三和最拿手粥品,再加上利興出名做茶檔,佢哋總共佔咗六個舖位。另一間老字號係利豐,最拿手係潮州滷水,最後一間係近7-11嘅榮記,最出名係奶茶和豬扒包。